توهقت وش تسوي ؟ ! ؟

بسم الله الرحمن الرحيم


السلام عليكم ورحمة الله وبركاته


اليوم يمكن أول مشاركة لي بالقسم بس أتمنى الجميع يستفيد منها وأساس المعلومات هذا عندنا خزان يندي = يهرب ماء المهم قلنابنغير الخزان ومير يطلع لي واحد من الشباب للسيد الوالد وينصحه بالأتي :



قال له جب بيضة ومقدار فنجالين سمنت وأخلطهم سواء من غير إضافة ماء ومكس تو قذر يعني اخلطهم صح

وأحطه بالمكان اللي فيه تهريب وبس انسى لو تجيب مطرقة ما يقوم إلا ماشاء الله وأحسن شي للرقم حقت الماء بالسيارة علاج ناجح واحد مجربها يقول سنتين لين بعت السيارة ما أختربت

وناسة صح المعلومة
:
يالله ندخل على باقي المعلومات اللي سردها لنا في سياق هالمعلومة حقت البيض بالاسمنت انا خابره بالجبن البيض ههههههههههههه بس يالله منهم نستفيد






الشغلة الثانية

أنت بالبر وأنخرم عندك كرتير الزيت وش تسوي أبد بسيطة و محلولة طال عمرك

خل معك بالسيارة صابونة لوكس أو دوف وش بنسبح حنا ههههههههه المهم ما علينا

نظف مكان التنسيم اللي في الكرتير ومرر الصابونة عليه مع الضغط على مكان التهريب وبس أمسك خط وما جاك عندي مجربة الطريقة ترى الزيت والصابون يصير مثل الحديد ولا يتم تهريب بإذن الله





والشغلة الثالثة


عندك خزان فيبر جلاس ومنكسر أو ينسم عندي الحل تجيب كم قطعة فلين وتحطهم في سطل وتصب عليه بنزين وحرك لين يذوب الفلين ويصير زي الصمغ وخذ والصع في المكان اللي في التهريب او الفيبر جلاس للسيارة اللي منكسر نفسي الشيء بعد وخلاص بإذن الله يمسك ويضبط



والشغلة الرابعة

لو عندك تنسيم في الرديتر حق السيارة عندي الحل جب لك كم سيجارة وفتتها في قلب الرديتير وخلاص أنسى ما راح تشوف تهريب لأن الفتات يروح لين الأمكان المخرومة عشان يطلع لكن ما يقدر يمر
وبذلك يتم التسكير وبس



والشغلة الخامسة

لو عندك تنسيم في في القزوز اللي هي الكنداسة أبد والسيارة باردة جب لي صمغ أبو عصرتين اللي يسمونه الصمغ القطري وأخلط وحط على مكان التنسيم وخلاص ما راح تسمع صوت تنسيم ولا شي بإذن الله



وبس سلامتكم لا تنسوني من صالح دعائكم بالخير والله يعطيه العافية اللي علمنا هالشغلات
وقلت بنزلها في المنتدى عشان الجميع يستفيد منها



وإلى اللقاء في جديد يجمعنا من جديد


اختكم
بنت**فله**ومطنشه**الشله


والسلام ختام يا سادة يا كرام